Last Updated on 3 months by admin
ඩේවිඩ් ඇන්තනි
Pic. credit: Linkedin
රංචු වශයෙන් වනාන්තරයේ ජීවත් වන සත්ව වර්ග බොහොමයකට නායකයෙක් සිටියි. ඒ නායකයා සිය කායික ශක්තිය ඔප්පු කර රැලේ නායකත්වය ලැබූවෙකි. දේශපාලන පක්ෂයක නායකත්වය ලබාගැනීම ඊට වඩා වෙනස් දෙයකි. එස්. ඩබ්ලිව්. ආර්. ඩී. බණ්ඩාරනායක වතු විකුණමින් මුදල් සොයා පක්ෂයක් හැදුවේය. බොහෝ කොමියුනිස්ට් පක්ෂ හැදුනේ රුසියාවේ සල්ලිවලිනි. කොමියුනිස්ට් පක්ෂ නායකයාට මධ්‍යම කාරක සභාවේ සමාජිකයන් සියයට සියයම පන්දම් ඇල්ලිය යුතු බව රුසියාවේ කො.ප. ඉතිහාසය ඔප්පු කර ඇත. කෙනෙකුට ජවිපෙ නායකත්වය ලබා ගැනීමට, බොරුව කපටිකම, පන්දම්කාරයින්ගේ පිහිට ආදී නොයෙක් ජඩකම් වුවමනා බව අප්‍රියෙල් කැරැල්ල මහනඩුව ඇසෙද්දී අනාවරණය විය.
සතුන් සතු සහජ හැකියාවන් නැති කිරීමට මිනිසාට පුළුවන. ඒ හිංසනයෙනි. නයින් නටවන්නන්ගේ නයින්ට දළ නැත. රිලා නටවන්නන් ළඟ ඉන්නේ දත් ගළවපු රිළවුන්ය. සර්කස් මඩුවල සේවය කරන හැම තිරිසනෙක්ම බියෙන් හැසිරෙති. ලංකාවේ අලින් එළවීම සහ වඳුරන් සිංචනය කිරීම මැයෙන් කෙරෙන්නේ නුසුදුසු බරපතල සත්ව හිංසනයකි. එයින් බෞද්ධයාට පහර ගැසීම සමහරුන්ගේ අරමුණයි. මේ ක්‍රියාවේ යෙදෙන්නන්ට අනාගත රජයකින් හෝ ස්වභාව ධර්මයෙන් දඬුවම් ලැබිය යුතුය. ඔවුන්ගේ දුෂ්ඨ ක්‍රියාවේ ප්‍රතිඵලය රටේ අලි හා වඳුරු සම්පත් වඳ වීමයි.
පුරාණ සිංහලේ හැම රටවැසියෙක්ම පරිසරවේදියෙකි. දැන් පරිසරවේදියා යනු තනතුරකි. ඊට හේතුව බටහිරුන් පරිසර විද්‍යාවක් හදා තිබීමයි. එනිසා රට වැසියා හා පරිසරය අතර හිඩැසකි. එය පැහැදිලි වන්නේ ශීත කාමරවලින් බැසට ගමට එන්නැයි පරිසරවේදීන්ට ඇතැම් ගොවියන් අඬගැසීමෙනි. සතුන් සමග ජීවත් වෙමින් සතුන් හා වගාව ගැන කතා කළ යුතු බව ඔවුන්ගෙන් කියැවේ. ඇතැමුන් කියන ලෙසට සජිත් ප්‍රේමදාසත් පරිසරවේදියෙකි.
බයිබලයට අනුව, මහජන නායකත්වය ලැබීම මැවුම්කරුගේ දීමනාවකි. මෝසස් ඊශ්‍රායල් වර්ගයාගේ නායකයා වීම මැවුම්කරුගේ ක්‍රියාවකි. දේශපාලනයේ මේ ක්‍රමය හැඳින්වෙන්නේ පන්දම් ඇල්ලීම නමිනි. කුමන දේශපාලන පක්ෂයක වත්, නායකයා විවේචනය කරන්නෙකුට, නායකත්වය අහලකට පැමිණීමට නොහැකිය.
බ්‍රිතාන්‍යයන් හඳුන්වා දුන් පාර්ලිමේන්තු ක්‍රමයට අනුව, පාර්ලිමේන්තුවට යන වැඩි පිරිසක් මහජනයාගේ ඡන්දයෙන් පත් වන නියෝජිතයෝ වෙති. මැතිවරණවලට ඉදිරිපත් වන පක්ෂ නියෝජිතයන්ට මහජනයාගේ ඡන්ද ලැබෙන්නේ ඔවුන්ගේ සිත් දිනා ගැනීමට සටකපටකම් කළ තරමටයි. ඒ නිසාම ඔවුන්ට බොරු කියන්නට සිදු වේ. රඟපාන්නට සිදු වේ. අපේකෂකයින්ගේ බොරු වංචා හා මගඩිවලට රැවටෙන ඡන්දදායකයින් බොහෝ විට සිය නියෝජිතයා කරගන්නේ මැට්ටෙකි. පජාතියෙකි. පඟරයෙකි. හොරෙකි. ආසන වැඩිම සංඛ්‍යාවක් ඇති ගම්පහ දිස්ත්‍රික්යේ මැතිවරණ ඉතිහාසය සෙවීමෙන් ඊට සාක්කි සපයා ගැනීමට පුළුවන.
බොරු කියා රඟපා වංචාවෙන් බලයට පත් වූ නියෝජිතයින් පිරිස මාලිමා රජය මුහුණපා සිටින ලොකුම ගැටලුවයි. හොර උපාධිකාරයින් ඊට සාක්කියයි. මාලිමා ආණ්ඩුව කතානායක තනතුරට පත් කරගත්තේ අණ්ඩපාලයෙකි. උපාධි සහතිකය ඉදිරිපත් කරගන්නට නොහැකි වූ ඔහු කල් පසු වී එය පෙන්වන්නම් කියා තනතුරෙන් ඉවත් වුණි. ඔහුට තව ටික කලකින් නැවතත් තනතුරක් ලැබෙන්නට ඉඩ තිබේ. එය දේශපාලනයේ ස්වභාවයයි. රූපවාහිනියෙන් ඉල්ලා අස් වූ සභාපතිට අලුත් තනතුරක් දෙන්නට යන බවට කතා පැතිරේ.
බලයට පත්වීම සඳහා මාලිමාකාරයින් කී බොරු එකතු කර පොතක් ලිවීමේ අදහස අපට තිබේ. සතුටින් පිරි රටක් හැදීම, රටින් හාල් ඇටයක් වත් නොගෙන්වීම, එක පෑන් පහරින් වී මෝල් ඒකාධිකාරය කැඩීම, කොමිස් නොගැහීම, අලි ප්‍රශ්නයට විද්‍යානුකූල විසඳුමක් සැපයීම, හොරුන් ඇල්ලීම, උගන්ඩාවේ සඟවා ඇති ජාතික ධනය ගෙන ඒම, එට්කා ගිවිසුම අවලංගු කිරීම, යහපත් මාධ්‍ය සංස්කෘතියක් බිහි කිරීම නිදසුන් කිහිපයකි. පෝලිම් නැති කරන බව කී අනුර කුමාර දිසානායක, හොඳ චිත්‍රපටි නැරඹීමට, හොඳ පොත් කියවීමට පෝලිම් ඇති කරන බවට පොරොන්දු දුන්නේය.
බොරුව පුද්ගලයාගේ විනාශයට හේතු වන බව බෞද්ධ ඉගැන්වීමයි.
නිදහස ලැබූ දිනයේ සිට රට පාලනය කළ ආණ්ඩු විසින් කරන ලද නාස්තිකාර වියදම් තව දුරටත් නොකරන බව කී මාලිමා නායකයෝ ජනාධිපතිවරයාගේ දිවුරුම් දීමේ සහ පාර්ලිමේන්තුව විවෘත කිරීමේ උත්සවය ඉතා චාම් අයුරින් කළහ. ඊට මහජනයාගේ ප්‍රසාදය හිමි විය. මෙය ඔවුන්ගේ විරුද්ධවාදීන් නිරුත්තර වූ සිද්ධියකි. අනුර කුමාර දිසානායක ජනාධිපති සහෝදරයාගේ පළමු වැනි විදේශ සංචාරය සිදු වූයේ මෙයින් පසුවයි. ඉන්දියානු රජය, රාජ්‍ය සම්ප්‍රදාය පරිදි ලංකාවේ ජනාධිපතිවරයා පිළිගැනීමට ගාම්භීර උත්සවයක් සූදානම් කර තිබුණි. වෙඩිවලට අලි කලබල වෙති. උත්සවයට සහභාගි වූ ලංකාවේ ජනාධිපතිවරයාත් එවැනි කලබලයකට පත් විය.
පුද්ගලයෙකුගේ ස්වභාවය දැන ගැනීම සඳහා ශාරීරික හැසිරීම නිරීක්ෂණය කිරීම අලුත් දෙයක් නොවේ. කැමරාව හා තාක්ෂණය දියුණු වීම නිසා එය බෙහෙවින් ජනප්‍රිය වී තිබේ. ‘බොඩි ලැන්වේජ්’ (Body Language) ඇසුරින් පුද්ගලයාගේ හැසිරීම නිරීක්ෂණය කිරීම ලෝකයේ රටවල් බොහෝමක සිදු වේ.
අනුර කුමාර දිසානායක ජනාධිපති සහෝදරයාගේ වචන නැති ශාරීරක හැසිරීම, රාජ්‍ය නායකයෙකුට නොගැලපුණි. එය රටටම ලැජ්ජාවකි. වරක් මෝදි අගමැතිවරයා ලංකාවේ ජනාධිපතිවරයාගේ උරහිසට අත තබා ඔහුව කැඳවාගෙන ගියේය. එක් මාධ්‍යවේදිනියක, ‘මේ මගේ කොල්ලා’ (දිස් ඉස් මයි බෝයි) යන පණිවිඩය එයින් කියැවෙන බව සඳහන් කර තිබුණි.
ජනාධිපතිවරයාගේ ඉන්දියා සංචාරයෙන් පසුව, ‘කච්චතිවු දූපත නැවත ඉන්දියාවට පවරා ගන්නැ’යි, තමිල්නාඩුව රජය ඉන්දිය මධ්‍ය රජයෙන් ඉල්ලා තිබේ. මේ බරපතල සිද්ධියට වරදකරුවා වීමෙන් ගැලවීමට අනුර දිසානායක ජනාධිපති සහෝදරයාට නොහැකිය.
සෝවියට් දේශයේ නායකත්වයට පත් වූ ජෝසප් ස්ටාලින් අභීත නායකයෙකි. ඔහුගේ නායකත්වයෙන් ලොව පුරා ගොඩනැගෙන කොමියුනිස්ට් බලය බිඳ දැමීමට නම්, සෝවියට් නායකත්වය දුර්වල කළ යුතු බව බටහිර පෙරමුණට තේරුණි. ඔවුන් ඒ වෙනුවෙන් කළ සටන ‘ශීතල යුද්ධය’ නම් වේ. ඊට පාප්තුමා වත් සම්බන්ධ කර ගැනීමට බටහිරුන්ට හැකි විය. ඔවුහු, සෝවියට් නායකත්වය පත් වූ ගොර්බචොව් මුරුංගා අත්තේ තියමින් ඔහු නෝබල් තෑග්ගට සුදුස්සකු කළහ. ගෝබිගෙන් පසු නායකත්වයට පත් වූ යෙල්සින් ප්‍රසිද්ධ බේබද්දෙකි. පුටින් ඉදිරිපත් වීමෙන් රුසියාව යම්තමට බේරුණි.
මාලිමා ආණ්ඩුවේ තරුණ කටයුතු භාර නියෝජ්‍ය ඇමති, මෙරට මාධ්‍ය අයිති මුදලාලිලාට අනුව පත්තරයත් විද්‍යුත් මාධ්‍යයත් නැටවූ අවුරුදු හැත්තෑ හතක දේශපාලනය වෙනස් කරමින් නව සමාජ මාධ්‍ය කලාවක් පිහිටුවූ බව කියයි. (දෙසැ. 23 දිවයින) මේ නම්, අපූරු ඇන්දවීමකි. යට දැක්වෙන්නේ, ජනාධිපතිවරයාගේ ඉන්දීය සංචාරය ගැන සිළුමිණ පුවත්පතේ පළ වූ ලිපියක කොටසකි.
“පූර්ණ රාජ්‍ය ගෞරව සහිතව ආචාර වෙඩිමුර 21 ක් පවත්වා ජනාධිපති අනුර කුමාර දිසානායක පිළිගන්නා ලදී. එහිදී ජනාධිපති අනුර කුමාර දිසානායක අශ්වාහරෝහකයන් පෙරටුකර ගනිමින් රාෂ්ටපති භවන් වෙත කැඳවාගෙන යාමෙන් අනතුරුව.”
ඉහත කී වර්ණනාව රාජ්‍ය උත්සව පැවැත්වීම ඇගැයීමකි. එසේ නම් දිවුරුම් දීමේ ගාම්භීර උත්සවය නොපැවැත්වීම මාලිමා රජයේ අනුවණකමකි. ඉන්දියාවේ අශ්වයා කළ ක්‍රියාව ඒ ලිපියේ සඳහන් නොවීය. ජනාධිපතිවරයා පිළිගැනීමේ උත්සවය රුපවාහිනී නාළිකාවලින් සජීවීව නරඹමින් සිටි හැමෝටම එය දකින්නට ලැබුණි.