Last Updated on 1 week by admin
කවුඩංගොල්ලේ මහවිදානේ විසිනි
මහාවංශයේ කියවෙන ප්‍රකාර අනුරාධපුරය අගනගරය කරගෙන සිරිලක පාලනය කරමින් සිටි යසලාලක තිස්ස රජතුමාට තමාගේ රුවට සමාන රුවැති සුබ නම් දොරටු පාලකයෙක් සිටියේය. ඒ, රාජ්‍ය ආරක්ෂක අංශයේ ක්‍රියාවක් විය යුතුයි. රජතුමා සමහර දිනවල මෙම දොරටු පාලකයා සිහසුනේ හිඳුවා මැති ඇමතිවරුන් පැමිණ රජු යයි සිතා ඔහුට ආචාර කරනු දැක සිනාසී ප්‍රීති වූයේය. මේ විහිළුවේ බරපතලකම ගැන ඔහුට සිතුණේ නැත. දිනක් සිහසුනට පැමිණ සිටි සුබ, සිනාසෙන දොරටුපාලයා අත්අඩංගුවට ගන්නැයි රාජ සේවකයින්ට නියම කළේය. අනතුරුව අධිකරණයට දැමූ යසලාලක තිස්සට මරණ දඬුවම නියම විය.
මේ කාලයේ රෝමය ග්‍රීසිය වැනි රටවල රජවාසල් සහ ප්‍රධාන ප්‍රභූ නිවාසයන්හි කතා කියන්නන් සිටි බවට තොරතුරු පවතී. පසු කලෙක මේ තනතුර වෙනස් වී ‘කෝට් ජෙස්ටර්’ නමින් තනතුරක් හැදුනු බව සමහර උගතුන්ගේ අදහසයි. ‘කෝට් ජෙස්ටර්’ විහිළුකාරයෙකි. මහනුවර රජවාසලෙහි අන්දරේ නමින් විහිළුකාරයෙකු සිටිය බව ප්‍රසිද්ධ කාරණයකි. සමහර විට බ්‍රිතාන්‍ය පාලකයින්ට හා ක්‍රිස්තියානි පූජකවරුන්ට සිනාසීමේ අදහසින් සිංහල රජවාසලේ මෙවැනි තනතුරක් පිහිටුවූවා විය හැකිය. ඇන්ඩෲ යන නම අන්දරේ හැටියට සිංහලට පරිවර්තනය වේ. ඇන්ඩෲ ක්‍රිස්තියානි ආගමේ ප්‍රධාන අපොස්තල්වරයෙකි.
බ්‍රිතාන්‍යයන් ගෙනා දකුණු අප්‍රිකානු සිරකරුවන්ගේ ක්‍රීඩාවක් සඳහා භාවිතා කළ කඩදාසි කුට්ටමේ ‘ජෝකර්’ කෙනෙක් සිටියි. ඔවුන් සිංහලේ පිහිටුවූ රාජ්‍ය සභාවේ නම් ජෝකර් නමින් විශේෂ පුද්ගලයෙක් නොසිටියේය. මාලිමා ආණ්ඩුව වමේ ආණ්ඩුවක් වශයෙන් පිළිගැනේ. වමේ ආණ්ඩුවලද එවැනි තනතුරක් නැත. නමුත් ලාල්කාන්ත ඇමතිවරයා මාලිමා ආණ්ඩුවේ ජෝකර් හැටියට කටයුතු කරන බව සමහරුන්ගේ අදහසයි. ඇමතිකම ගත් සැණින් වගාබිම්වලට එන සතුන්ව විනාශ කරන්නැයි වගාකරුවන් උසිගැන්වීම නිදසුනකි. පසුගිය කාලයේ වන වගාබිම් වලට පැමිණි අලින් සිය ගණනක් තුවක්කු කරුවන්ට ගොදුරුවුහ. පරාක්‍රම සමුද්‍රයට අයත් රක්ෂිතයේ පිහිටි හෝටලයක් ඉවත් කරන බවට වහසිබස් දෙඩීමෙන්ද ඔහු ජෝකරයකු බවට පත් වූයේ යැයි ජනතාව කියති.
රජයේ මිනින්දෝරු දෙපාර්තුමේන්තුවේ 99 වෙනි සංවත්සරය ඇමතු ඇමති ලාල්කාන්ත තමන්ට ‘ඩිමෙන්ෂියා’ ඇතැයි කීවේය. මෙය විහිළුවක් වශයෙන් පිළිගැනීමට පුළුවන. නමුත් එය යසලාලක තිස්සගේ විහිළුව වැන්නකි. ඊට හේතුව ලාල්කාන්ත ඇමතිවරයාට ඩිමෙන්ෂියා ඇත්නම් ඔහු අමාත්‍ය ධුරයක් දැරීමට නුසුදුස්සෙකු වන බැවිනි. ඩිමෙන්ෂියා රෝගියෙකු ඇමති ධුරයක් දැරීමෙන් රටට විශාල හානියක් සිදු විය හැක.
වයසට යාම නිසා හෝ වැඩබහුලවීම නිසා හෝ කිසිම පුද්ගලයෙක් ඩිමෙන්ෂියා රෝගියෙකු බවට පත් නොවේ. ඩිමෙන්ෂියා යනු දරුණු මානසික රෝගයකි. මෙය වැලඳුන සමහර රෝගීන්ට අඩසියවසකට වැඩි කලක් තමා සමග එකට විසූ අඹුව හෝ පුරුෂයා හඳුනාගැනිමට නුපුළුවන් වු අවස්ථා ගැන අසන්නට ලැබේ. ඩිමෙන්ෂියා යනු අමතක වීම නොවේ. මෙය මොළයේ සෛලයන්ට හානි සිදුවීමෙන් හටගන්නා ආබාධ පොකුරකි. ලාල්කාන්ත තමා ඩිමෙන්ෂියා රෝගියෙකු යයි කෙබරයක් ඇරියේ මාලිමාව බලයට පත්කළ ඡන්ද දායකයින්ව ඇන්දවීමට යයි තවත් සමහරු කියති.
පසුගිය දිනෙක ලොහාන් රත්වත්තේ අභාවයට පත් විය. ඔහු කවරදාක වත් පාර්ලිමේන්තුවේදී හෝ ඉන් පිටතදී ජෝකර් කෙනෙකු ලෙසට හැසිරුන අයෙක් නොවේ. එය ජාන උරුමයකි. ලොහාන් සිංහල රාජධානියේ සෙනෙවියෙකුව සිටි ලෙව්කේ මැතිතුමාගේ පරපුරෙන් පැවතෙන්නෙකි. යුරෝපීය ආක්‍රමණිකයන්ට හිසරදයක් වූ ලෙව්කේ මැතිඳු ස්වභාවික මරණයක් හිමිකර ගත්තෙකු නොවේ. ඔහු මැරවීම කුමන්ත්‍රණයක් යයි සිතන්නට බොහෝ හේතු තිබේ. මේ කවිය, රටේ ජනතාව ලෙව්කේ මැතිඳු ගැන කියන ඉතිහාස කතාවකි.
පුන්සඳ සේම පායාලා රට මැද්දේ
රන්කෙඳි සේම පීරාලා පිට මැද්දේ
මාර සෙනග වටකරගෙන යම යුද්දේ
ලෙව්කේ මැතිඳු අද තනියම වෙල මැද්දේ
ලොහාන් රත්වත්තේ සිරගත වීමෙන් පසු හදිසියේ මියයාම රටේ බොහෝ දෙනෙකුගේ විශ්මයට කාරණයකි. සිරගත වන පුද්ගලයන් මිය යන විට බොහෝ දෙනාට සැක පහළ වේ. වලිසිංහ හරිශ්චන්ද්‍රතුමාට සිරගෙයි සිටියදී වස දුන් බව සිතන පිරිසක් සිටිති. බණ්ඩාරනායක ඝාතනයට අසුවී බන්ධනාගාර ගත කෙරුණු බුද්ධරක්ඛිත හිමියෝ ඝාතනය පිළිබඳ ඇත්ත කතාව ලියන්නට සූදානම් වූහ. හිටිහැටියේම හැදුණු හෘදයාබාධයකින් උන්වහන්සේ අපවත් වූහ. ‘ඉරිදා අරුණ’ පත්‍රයේ පළ වූ ලිපියකට අනුව ලොහාන් රක්ෂිත බන්ධනාගාරයේ සිටියදී රෝගී වූයේය. අක්මාව රෝගී වීමේ හේතුවෙන් මිය ගියේය.
ලංකාවේ බොහෝ පුද්ගලයින්ට වීරයා සහ විගඩමා වෙන් කරගැනීමේ ප්‍රඥාව නැත. මෙවැනි විපතකට ප්‍රධාන හේතුව ජනමාධ්‍යකාරයින්ගේ හැසිරීමයි. ලංකාවේ ජනමාධ්‍යකරුවා වැටුපක් සඳහා රජයේ හෝ පෞද්ගලික ආයතනයක සේවය කරන්නෙකි. මෙවැන්නන්ට ස්වාධීනව කටයුතු කිරීමේ හැකියාව අඩුය. ජනමාධ්‍යකරුවාට උපකාර කිරීමෙන් ජනතාවට වැරදි පණිවිඩ දීමේ හැකියාව පුද්ගලයින්ට හා සංවිධානවලට ඇත. කාදිනල්ව ‘මාහිමිපාණන්’ කිරීම උදාහරණයකි. මෙම වැරදි තනතුරු නාමය සමාජ ගත කිරීමට තවමත් වෙහෙසෙන ජනමාධ්‍යකරුවන් පිරිසක් සිටිති. කැකිරාවේ සුදස්සන හිමියන්ව රටේ ප්‍රසිද්ධ කිරීමත් ජනමාධ්‍යකරුවන්ගේ ක්‍රියාවකි. මාලිමාව බලයට පත් කිරීමට සහ බුදු සසුනට හානි කිරීමට සුදස්සන හිමියන්ගේ දේශනවලින් යම් පිටුවහලක් ලැබුණි.
මේ වන විට සුදස්සන හිමියන්ට ඇත්ත තේරී ඇති බව උන්වහන්සේගේ ප්‍රකාශවලින් පැහැදිලි වේ. ඒ බුද්ධිමය වෙනසට සමහරුන් කැමති නැත. සුනිල් සෙනවි ඇමතිගේ විහාර දේවාලගම් සංශෝධන පනත මගින් සුදස්සන වැනි හිතුවක්කාර අදහස් ප්‍රකාශ කරන හාමුදුරුවරුන් පාලනය කිරීමට ඉඩ ලැබේ යයි ගොන් කතාවක් ලියා මැටා මගින් ප්‍රසිද්ධ කිරීම නිදසුනකි. සුනිල් සෙනවි පරම්පරාවෙන් බෞද්ධයෙක් නොවේ. බුදුසසුනට හානි කළ පුද්ගලයින් ඔහුගේ පරම්පරාවේ සිටි බව කියැවේ. මෙවැන්නෙකු මගින් බුදුසසුනට සේවයක් කළ හැකි යයි කියන්නා කපටියෙකි. ඒ තකතීරු අදහස පිළිගන්නා බෞද්ධයා පල් මෝඩයෙකි.