Last Updated on 6 days by admin
ඩේවිඩ් ඇන්තනි
Pic. credit: mepei.com
ඊශ්‍රායලය දෙවන ලෝක යුද්ධයෙන් පසුව යුදෙව් ජනයා ආරක්ෂා කිරීමට පිහිටුවන ලද රටකි. ඉස්ලාම් රටවල් මැද ඉස්ලාම් නොවන ආගමිකයන් සඳහා රටක් ඇති වීම ගැන උරණ වූ අරාබි රටවල් ගණනාවක් කිහිප අවස්ථාවකදීම යුද්ධ බලයෙන් ඊශ්‍රායලය ලෝක සිතියමින් ඉවත් කිරීමට උත්සාහ කළද එය සාර්ථක නොවීය. ලෝක බලවතා වූ ඇමරිකාව, ඊශ්‍රායලය ආරක්ෂා කළේය. මේ ආකාරයෙන් අනාගතය කාලයේ ඊශ්‍රායලය ආරක්ෂා කිරීමට ඇමරිකාවට නොපුළුවන. ඊට එක් හේතුවක් ඇමරිකාවේ ආර්ථික ආධිපත්‍යයට තර්ජනයක් එල්ල වී තිබීමයි. චීනය, ඇමරිකාවේ බලයට අභියෝග කරන එක් රටකි.
ජනාධිපති ඩොනල්ඩ් ට්‍රම්ප් ඇමරිකාවෙන් ගිලිහෙන බලය ආරක්ෂා කරගැනීමට උපායයන් ගණනාවක් ක්‍රියාවට නංවයි. එකක් ලෝක බලය අත්හැරීමයි. පසුගිය දිනවල ලංකාවේ කතාබහට ලක් වූ ඇමරිකානු ආධාර (යූඑස්ඒඩ්ස්) වැඩපිළිවෙළ නැවැත්වීමේ අරමුණ, ඇමරිකාවේ වියදම් අඩු කිරීමයි. ට්‍රම්ප්, කැනඩාව හා මෙක්සිකෝව ප්‍රධාන දකුණු ඇමරිකානු රටවල් ගණනාවක් එකතුකර ශක්තිමත් ඇමරිකාවක් සැදීමට වෙහෙසේ. මේ හැම ක්‍රියාවකම පරමාර්ථය ඇමරිකාවේ බලය රැකගැනීමයි.
ඊශ්‍රායලය, මහා ඊශ්‍රායලයක් Greater Israel සැරසේ. ඒ පිළිබඳව අදහස් දක්වන සමහරු, යුප්‍රටීස් හා නයිල් ගංගා අතර මහා භූමි ප්‍රදේශය ඊට අයත් වන බව කියති. ලෙබනනය, සිරියාව, ජෝර්දානය, ඉරාකය, තුර්කිය හා සවුදි අරාබිය ආදී රටවල් මහා ඊශ්‍රායලයට අයත් විය හැකි යයි තවත් සමහරු සිතති.
බයිබලයේ පරණ ගිවිසුම ප්‍රකාර යුදෙව් වර්ගයා දීර්ඝ කාලයක් වහලුන් වශයෙන් මිසරයේ ජීවත් වූහ. එහි පිරමීඩ ගොඩනංවා ඇත්තේ ඔවුන්ය. ඊශ්‍රායල්වරුන් වහල් බවින් මුදවාගන්නට ඔවුන්ගේ මැවුම්කාරයා (ගොඩ්) ඉදිරිපත් වූහ. බයිබලයේ සඳහන් වන මැවුම්කාරයා ඊශ්‍රායල්වරුන්ගේ දෙවියෝය. එතුමා උක්ත කටයුත්ත සඳහා ‘මෝසස්’ තෝරාගත්තේය. මිසර රජ මාළිගාවේ ඇතිදැඩි වුන මෝසස්, යුදෙව් වර්ගයාට සම්බන්ධ වන හැටි බයිබලයේ විස්තර වේ.
මිසරයේ දුක් විඳින යුදෙව්වන් සමග රටින් පිටවන්නැයි මෝසස්ට කී මැවුම්කාරයා, ඔවුන්ට ‘කිරියෙන් පැණියෙන් උතුරන රම්‍ය වූ දේශයක් ලබා දෙන්නෙමි’යි පොරොන්දු වූයේය. මෝසස් ඊශ්‍රායල්වරුන්ට නායකත්වය දෙමින් ඔවුන් මිසරයෙන් පිට කරගත්තේය. වසර ගණනාවක් ඔවුන් සමග කාන්තාරයේ ඇවිද්ද ඔහු, පදිංචි විය යුතු භූමිය පෙන්වා මිය ගියේය. ‘මහා ඊශ්‍රායලය’ ගොඩනැගෙන්නේ, මෝසස් ඊශ්‍රායල් වහලුන් සමග මිසරයේ සිට ගමන් කළ භූමිය මුල් කරගෙනයි. බයිබලය පිළිගන්නා කිසිවෙකුට මහා ඊශ්‍රායල් සංකල්පය ප්‍රතික්ෂේප කරන්නට නුපුළුවන. සිරියාව, මිසරය ආදී රටවල ක්‍රිස්තියානි ජනකණ්ඩායම් සිටිති. ඔවුන්ටත් බයිබලය පැහැදිලි කරන මහා ඊශ්‍රායලය පිළිගන්නට සිදු වේ.
ඉන්දීය අගමැති නරේන්ද්‍ර මෝදි, ‘මහා ඉන්දියාවක්’ ගොඩනැංවීමට සැරසේ. ‘මහා භාරතය’, ඔහු අදහන හින්දු ආගමට පදනම වූ බ්‍රාහ්මණ ආගමික සංකල්පයයි. ඊට අනුව මහා භාරතය හින්දු දෙවිවරුන් විසින් ගොඩනංවන ලද්දකි. ‘අක්හණ්ඩ් භාරත්’ Akhand Bharat යනු මහා භාරතයේ විස්තර කෙරෙන නොබෙදුන ඉන්දියාවයි. ඊට ඇෆ්ගනිස්ථානය, භූතානය, ඉන්දියාව, බංගලා දේශය, පකිස්ථානය, මාලදිවයින්, මියන්මාරය, නේපාලය, ශ්‍රී ලංකාව, ටිබෙටය යන රටවල් අයත් වේ. ‘රාමායනයේ’ ඓතිහාසික අගය ගැන දැඩි විශ්වාසයක් දරන හින්දූහු, ශ්‍රී ලංකාව ඉන්දියාවේ කොටසක් සේ සලකති.
මහා භාරතය සංකල්පය අනුව එය ගොඩනැංවූ රජවරු සිටිති. මහා වංශයට අනුව ධර්මාශෝක රාජයා එවැන්නෙකි. බෞද්ධයෙකු වූ එතුමා බුදුදහම මහා භාරතයේ ආගම බවට පත් කළේය. මහා භාරතයේ බෞද්ධ ධර්ම දූතයෝ මැද පෙරදිග රටවලට පවා ගියහ. චීනය බෞද්ධ රටක් කරන්නේද භාරත භික්ෂුන් වහන්සේල විසිනි. අශෝක රජයාගේ බෞද්ධ දූතයෝ සිංහල දේශයටද පැමිණියහ. ඒ දූත පිරිසේ නායකත්වය දැරූ මිහිඳු හිමියෝ, අශෝක රාජයාගේ පුතෙකු වූහ. භික්ෂුණී ශාසනය පිහිටුවූ සංඝමිත්තා තෙරනිය එතුමාගේ දුවෙකි.
නොබෙදුන බෞද්ධ භාරතය විනාශ වන්නේ, නැගෙනහිරින් පැමිණි ඉස්ලාමික ආක්‍රමණියන්ගෙනි. ඔවුන් අතිශයින් බිහිසුණු ප්‍රචණ්ඩකාරී සංස්කෘතියක් ගොඩනංවා ගෙන සිටියහ. ඉස්ලාමික හමුදා සිදු කළ සිද්ධස්ථාන ගිනි තැබීම, පිරිමින් මැරීම, ස්ත්‍රීන් හා ගැහැණු ළමයින් අල්ලා ගැනීම ඒ ප්‍රචණ්ඩ සංස්කෘතියේ අංග ස්වල්පයකි. ඔවුන්ගේ පරමාර්ථය වූයේ අල්ලාට පක්ෂ මනුෂ්‍යයින් පිරි ලෝකයක් බිහි කිරීමයි. ඒ සඳහා සියලුම මනුෂ්‍යයින් දෙවියන්ට අවනත කරවීම (යාච්ඥාව) ඉස්ලාම් ආගමික සිරිත විය. ඉස්ලාම් ආගමිකයෝ අදටත් දිනකට පස් වරක් යාච්ඥා කරති.
නරේන්ද්‍ර මෝදි, ඉස්ලාම් අන්තවාදයට හා ත්‍රස්තවාදයට විරුද්ධ පාලකයෙකි. ඔහු ඉන්දියාව කැබලි කළ ඉස්ලාම් ත්‍රස්තවාදය ගැන සැලකිලිමත් වේ. ඊශ්‍රායලය ආරක්ෂා කරන ඇමරිකාව මෝදිට සහාය දෙයි. එංගලන්තය, ප්‍රංශය ඇතුළු බටහිර යුරෝපයේ රටවලින් ඒ සහාය නැතත්, ඒ රටවල ජනයා ඉස්ලාම් සංක්‍රමණිකයන් නිසා පීඩාවට පත්ව සිටිති. ඕලන්දය ප්‍රධාන රටවල් ගණනාවක සුදු ජාතික ව්‍යාපාර එහි ප්‍රතිඵලයකි. ඉදිරි කාලයේ යුරෝපයේ ඇති වන ආර්ථික අර්බුදයත් සමග මෙම රටවල සුදු ජාතිකයන් අතර සංක්‍රමණියන්ට විරුද්ධ ක්‍රියා ඇති වීමට බොහෝ ඉඩ දුරට ඉඩ තිබේ.
ඉස්ලාම් රටවල සංස්කෘතික පෙරළියක් ඇති කිරීමටත් ඇමරිකාව සහ ඉන්දියාව වෙහෙසී ඇත. ඩුබායි වැනි අලුත් නගර ඊට සාක්ෂියකි. සවුදියේ අල් කොබාර් වැනි නගර ගොඩනැගී ඇත්තේ ඇමරිකානු ක්‍රමයට අනුවය. මෙවැනි අලංකාර නගර ගොඩනංවන රටවලට යුද්ධවලට සහභාගි වීමට නුපුළුවන. එක් බෝම්බ ප්‍රහාරයකින් මුළු නගරයක්ම විනාශ වීමට ඉඩ ඇත.
කාලයක් මුළුල්ලේ ලෝකයේ ආගමික අන්තවාදය පැතිරවූ බවට චෝදනා ලබන සවුදි අරාබියේ කාන්තාවන් අතර යෝග අභ්‍යාස ජනප්‍රිය වීමත් ඉස්ලාම් සංස්කෘතිය නවීකරණය වීමට නිදසුනකි. සවුදියේ ගැහැණු පාසල්වල යෝග අභ්‍යාස ඉගැන්වෙයි. යෝග, සවුදියට ගියේ ඇමරිකාවෙන් නමුදු එය ඉන්දියාවේ උරුමයකි.
ලංකාවේ පාස්කු ප්‍රහාරය පසුපස ඉස්ලාම් අන්තවාදය හා ත්‍රස්තවාදය ඇති බව බොහෝ දෙනාගේ විශ්වාසයයි. එය වෙනස් කිරීමේ වුවමනාව මාලිමා රජයට ඇත. මාලිමාව බලයට පත් කිරීමට වෙහෙසුන කතෝලික සභාවේ නායක මැල්කම් රංජිත් කාදිනල්වරයා කියන්නේම පාස්කු ප්‍රහාරය පසුපස මහා මොළකාරයෙකු සිටින බවයි. එතුමා ඇඟිල්ල දිගු කරන්නේ ගෝඨාභය රාජපක්ෂ ප්‍රධාන කිහිප දෙනෙකුට යැයි සමහරු සිතති. බෞද්ධයන් පාස්කු ප්‍රහාරයට සම්බන්ධ කිරීමට මාලිමා දේශපාලනඥයින් පිරිසක් වෙහෙසෙන්නේ යයි දැයි සැකය බුද්ධිමතුන්ට ඇතිවී තිබේ. (සැම් සෙනෙවිරත්නගේ බෝධි සභා ලිපි පෙළ බලන්න)
ඉදිරියට යන ලෝකය හමුවේ මැල්කම් රංජිත් කාදිනල් ප්‍රධාන ලංකාවේ කතෝලික සභාව කරන්නේ ලංකාව ආපස්සට දැක්කීමයි. සමහර විට ඔවුන්ගේ වෑයම මධ්‍යතන යුගයේ කතෝලික සංස්කෘතිය යළි පිහිටුවීම විය හැකිය. අල්තාරය වෙත ගොස් පූජා පැවැත්වීමේ හැකියාව කතෝලික පූජකවරියන්ට අහිමි කිරීම නිදසුනකි. (මේ ප්‍රවෘත්තිය පළ වූ Globalsistersreport වෙබ් අඩවියෙන් දින කීපයකට පසු ප්‍රවෘත්තිය ඉවත් කර තිබේ. Ban altar girls upsets nuns Srilanka stirs talk women church roles – Globalsistersreport). මේ තීරණය ගනු ලබන්නේ, කාන්තා අයිතීන් වෙනුවෙන් ලෝකය පුරා කාන්තා ව්‍යාපාර ක්‍රියාත්මක වන අතරයි. පාස්කු ප්‍රහාරයට වඩා භයානක ත්‍රස්ත ක්‍රියා ලංකාවේ කතෝලික ආගම පිහිටුවූ කතෝලික බිෂොප්වරුන් අතින් සිදු වී තිබේ. වර්තමානයේ මුන්නේශ්වරම පිහිටි ස්ථානයේ තිබූ මූලසෝම විහාරය ගිනි තැබූ හැටි පෘතුගීසි ලේඛකයෝ සඳහන් කරති. කාදිනල්තුමන් පාස්කු ප්‍රහාරය අවුස්සන විදිහට බෞද්ධයන් මෙවැනි අතීත සිදුවීම් ඇවිස්සුවහොත් රටේ ආගමික භේදයක් ඇති වේ.
මැල්කම් රංජිත් කාදිනල්තුමාගේ ඉල්ලීම් ඉටුකරන්නට ගියොත් මාලිමාවට සිදු වන්නේ ඉස්ලාම් ත්‍රස්තවාදයක් නැතැයි කියන්නටයි. සිංහල බෞද්ධ ත්‍රස්තවාදයක් ඇතැයි ඇඟවීමටද සිදු වේ. බුද්ධාගම භාරත උරුමයක් බව පෙන්වන නරේන්ද්‍ර මෝදි, ඉස්ලාම් ත්‍රස්තවාදයක් ඇතැයි කියයි. එම නිසා මාලිමාවේ ක්‍රියාවෙන් සිංහල බෞද්ධයන්ට ඉදිරි කාලයේ විශාල පාඩුවක් සිදු වීමට ඉඩ තිබේ. ජවිපෙ අතීතයේ කළ ත්‍රස්ත ක්‍රියාවලින් කතෝලිකයන්ට හෝ ඉස්ලාමිකයන්ට විපතක් සිදු නොවීය. එහෙත් සිංහල බෞද්ධ සංහාරයක් සිදු විය. පන්සල් විශාල ප්‍රමාණයක් පාළු විය. තරුණ භික්ෂුන් වහන්සේලා වැඩි පිරිසක් ඝාතනය කර ඇත්තේ ‘ධර්මචක්‍රය’ නමැති වධය පැමිණවීමෙනි. මෙවැනි විනාශයන් සිදුවී ඇතත් සාමනේරවරුන්ගේ චර්යාවන් වෙනස් කර ඔවුන්ව මැරයන් බවට පත් කිරීමේ වැඩපිළිවෙළ ජවිපෙ හා පෙරටුගාමීන් ඉදිරියට ගෙන යති. පසුගිය කාලයේ ඔවුන් සිදු කළ විථි අරගලවලදී තරුණ භික්ෂූන් සිවුරු ගලවා විසිකර යට කලිසම් පිටින් දුවන දර්ශන රූපවාහිනී නාළිකාවලින් පවා ප්‍රදර්ශනය විය.
ඇමරිකාව, ඉන්දියාව, ඊශ්‍රායලය, චීනය වැනි රටවල් සිය දේශයන් විශාල කරන්නට වෙහෙසෙති, මාලිමාව වෑයම් කරන්නේ කාදිනල්තුමා සහ බෙදුම්වාදීන් සතුටු කරමින් ශ්‍රී ලංකාව කුඩා කිරීමටයි. ඔවුන් ගෙනෙන අලුත් ව්‍යවස්ථාව හා පළාත් ස්වාධීන කිරීම මගින් කෙරෙන්නේ රට බෙදීම හා ශ්‍රී ලංකාව කුඩා වීමයි.