Last Updated on 22 hours by admin
කොලට් සේනානායක
නාරද කරුණාතිලක
Pic. credit: The Guardian
‘අද මහා මාර්ගේ දුකින් හිඟන්නා හෙට ධනපතියා වී සැප විඳිනා රජ දුගි වේ දුගි රජ වේ සෝබා දහම සේ කැරකේවී රථ රෝදේ වාගේ’ කලක් ජනප්‍රියව පැවති සිංහල සින්දුවක කොටසකි. මාක්ස්වාදයට අනුව මෙයින් ඉදිරිපත් කෙරන්නේ අමු ප්‍රතිගාමී අදහසකි. මාක්ස්වාදයෙන් බැහැර වූවෙකුට සින්දුවෙන් ප්‍රකාශ වන්නේ පට්ට ඇත්තකි. වර්තමානයේ ධනපතියන් වී සිටින පවුල් බොහෝමයකට දිළිඳු අතීතයක් තිබේ. පාර්ලිමේන්තුවට තරග කළ ආර්. ප්‍රේමදාසට මහජනයා මුදල් එකතු කර වාහනයක් පරිත්‍යාග කළහ. දිළින්දන් ලෙසින් රාජ්‍ය සභාවට පැමිණ සිටින මාලිමා මන්ත්‍රීවරුන් වැඩි දෙනෙකු තව කලකදී ධනවතුන් බවට පත් නොවේ යයි කියන්නා ලෝක ධර්මය නොදන්නෙකි.
අතීතයේ ලංකාවේ වාමාංශිකයෝ, රටේ වැසියන් නිර්ධන සහ ධනපති වශයෙන් කොටස් දෙකකට බෙදිය හැකි යයි කීහ. එබඳු ස්වභාවයක් කාල් මාක්ස් ජීවත් වූ එංගලන්තයේ තිබුණි. කාලයක්ම එංගලන්තය මංකොල්ලකරුවන්ගේ රටක් විණි. ඔවුන්ට මංකොල්ල හමුදා තිබුණි. ‘සී ඩෝග්ස්’ (මුහුදු බල්ලෝ) එවැනි මංකොල්ල හමුදාවකි. පළමු වැනි එළිසබෙත් රැජින මුහුදු බල්ලන් රැලේ නායක ප්‍රැන්සිස් ඩ්රේක්ට නයිට් පදවියක් පිරි නැමුවාය. ‘පෙරදිග ඉන්දියා වෙළෙඳ සමාගම’ මංකොල්ල සමාගමකි. ‘සී ඩොග්ස්’ලා මුහුදේ මංකොල්ලකෑහ. පෙරදිග ඉන්දියා වෙළෙඳ සමාගම රටවල් මංකොල්ල කෑහ. රොබට් බ්‍රවුන්රිග් යනු ඒ ක්‍රියාව උදෙසා සමාගම විසින් ලංකාවට එවන ලද ඉංග්‍රීසි සේනාපතියෙකි. ලක්ෂ ගණනක් සිංහලයන් මරාදෑමීම, ගම් පාළු කිරීම සහ ස්වදේශිකයන්ගේ දේපොළ කොල්ලකෑම ඔහුගේ නියෝගයෙන් සිදු විය.
ඔවුන් මෙවැනි අපරාධ තවත් රටවල සිදු කර තිබේ. කොල්ලකෑමෙන් ලද අති මහත් ධනය එංගලන්තයට ගලා ආවේය. ඔවුහු, යටත් රටවල විද්‍යාව සහ තාක්ෂණ දැනුමත් කොල්ලකෑහ. ලංකාව ඈත අතීතයේ පටන් රෙදි හා යකඩ කර්මාන්ත පැවති රටකි. මහාවංශයෙන් සහ පුරාවිද්‍යාවෙන් ඊට සාක්කි ලැබේ. ඉන්දියාව හා ලංකාව යටත් කරගත් පසුව එංගලන්තයේ කාර්මික විප්ලවය ඇති විය. මේ නමින් එහි සිදු වී ඇත්තේ පේශ කර්මාන්ත සහ යකඩ කර්මාන්ත ශාලා ආරම්භ වීමයි. මේවාට තාක්ෂණය හා ප්‍රාග්ධනය ලබාගෙන ඇත්තේ ඉන්දියාවෙන් හා ලංකාවෙනි.
ලන්ඩන් නගරයේ ජීවත් වූ මාක්ස්, අලුතින් බිහි වූ කර්මාන්ත ශාලා දුටුවේය. ඒවාට කම්කරුවන් සපයා ගන්නා ලද්දේ ගම්වලිනි. ඒ ගැමියෝ, අප්‍රිකානුවන් එහි ගෙනෙන තුරු වහල් ජීවිත ගෙවූහ. මාක්ස්, ‘දම්වැල් මිස, නැති වීමට කිසිවක් නැතැ’යි කියන්නේ ඒ නිර්ධනයින් පිළිබඳයි.
‘මේඩ් ඉන් ඉන්ග්ලන්ඩ්’ සම්ප්‍රදායෙන් උගතුන් වූ ආචාර්ය මහාචාර්යවරුන්, ‘ඉඩම් කොටු කිරීමේ ව්‍යාපාර’ වැනි ලස්සන නම්වලින් විශ්වවිද්‍යාලයන්හි ආර්ථික විද්‍යාව උගන්වන විට, බොහෝ විද්‍යාර්ථීනට මේ ඇත්ත නොවැටහී යයි.
දැන් එංගලන්තයේ තියා ලෝකයේ මොනම රටක වත් සමාජය, නිර්ධන හා ධනපති වශයෙන් කොටස් දෙකකට බෙදිය නොහැකිය. අනුර දිසානායක ජනාධිපතිවරයා නිර්ධන පංතියේ නායකයෙකු නොවේ. ඔහුගේ පාලනය යටතේ පීඩාවට පත්වන විවිධ වෘත්තිකයෝ වර්ජන කරති. විශ්වවිද්‍යාල සිසු සිසුවියෝ පාරට බසිති. රැකියා නැති උපාධිධාරියෝ පෙළපාළි යති. මෙවිට ඇතැම් මාලිමා නායකයින් කියන්නේ, ‘නිර්ධන පංතියේ ආණ්ඩුවක් රට පාලනය කරන නිසා එවැනි ක්‍රියා නොසිදුවිය යුතු බව’යි. නිර්ධන පංතියක් නැති රටක නිර්ධන පංතියේ ආණ්ඩුවක් බිහි විය නොහැකි බව සමහරුන්ට නොවැටහේ.
භේද ඇති කර මහජනයා කොටවමින් රටවල් පාලනය කිරීම එංගලන්තයේ පාලන සම්ප්‍රදායකි. ඔවුන් ඉන්දියාවට නිදහස දුන්නේ රට බෙදා පකිස්ථානය නමින් රටක් ඇති කිරීමෙන් පසුවයි. එංගලන්තය, මේ ජරා සිරිත තවමත් අත්හැර නැත. කොටි යුද්ධය ජයගැනීමට වෙහෙසුන ලංකාවේ හමුදා නායකයින් කිහිප දෙනෙකුට හා විනයාගමුර්ති මුරලිදරන්ට සම්බාධක පැමිණවීම නිදසුනකි. මෙය ඒක පාර්ශවික ක්‍රියාවක් කියා ඇඟ බේරාගැනීමට සැරසෙන මාලිමාව කරන්නේ, තම අත්වලින් ඉංග්‍රීසිකාරයාගේ හෙලුව වැසීමයි. ඔවුන් හැසිරෙන්නේ එංගලන්තය කොටින්ගේ තිප්පොලක් බව නොදන්නා අයුරිනි. මාලිමාව බලයට පත් කිරීමට දෙමළ ඩයස්පෝරාව මූලික වූයේය. සම්බාධක පැනවීම, දෙමළ ඩයස්පෝරා පිනවීම පිණිස එංගලන්තය කළ ක්‍රියාවකි. මෙහිදී, රනිල් වික්‍රමසිංහ හිටපු ජනාධිපතිවරයාට හැංගීමට නොපුළුවන. ඔහු දෙමළ ඩයස්පෝරාව ලංකාවට කැඳවීමට මූල් වූයේය.
පසුගිය කාලයේ ලෝකයේ බල කඳවුරු දෙකක් තිබුණි. ඒ කාලයේ සිටි පාලකයින්ගේ සිරිත වූයේ ලංකාව කිසිම බල කඳවුරකට නොබැඳී සිටීම නමැති විදේශ ප්‍රතිපත්තියක් ප්‍රකාශ කිරීමයි. සිරිමා බණ්ඩාරනායක අගමැතිවරියගේ කාලයේ නොබැඳි ජාතීන්ගේ සමුළුවක් ලංකාවේ පැවැත්වුණි. දැන් ලෝකයේ එවැනි බලකඳවුරු දෙකක් නැත. එදා නොබැඳි ජාතීනට අයත් රටක්ව සිටි ඉන්දියාව ‘එක පවුලක් වශයෙන් කටයුතු කරන ලෝකයක් ගොඩනැගීම’ නමින් විදේශ ප්‍රතිපත්තියක් ප්‍රකාශයට පත් කර තිබේ. රුසියාව ඊට සම්පූර්ණයෙන්ම එකඟබව රුසියාවේ විදේශ ඇමති සර්ජෙයි ලැබ්රෝයි පසුගිය දිනක ප්‍රකාශ කළේය.
බ්‍රිතාන්‍යය, එක්සත් ඉන්දියාවට අකමැති රටකි. රජිව් මල්හෝත්‍රා ‘බ්‍රේකින් ඉන්ඩියා’ ලියමින් ප්‍රකාශ කරන්නේ බටහිර විශ්වවිද්‍යාල ඉන්දියාව බෙදීමට ආධාර කරන පිළිවෙළයි. ඇතැමුන් මෝදිගේ ආණ්ඩුව පෙරලා රාහුල් ගාන්ධිගේ කොංග්‍රස් පක්ෂය බලයට පත් කිරීමට සැරසෙන්නේද ඉන්දියාව බෙදීමටයි. ආරක්ෂක ඇමති අමිත් සෙන් පසුගිය දිනක 2025 සංක්‍රමණික සහ විදේශීයයන් පිළිබඳ පනත ඉදිරිපත් කරමින් බටහිර බෙංගාලයේ කොංග්‍රස් නායිකාව ඡන්ද ගැන සිතා බංගාලි සහ රෝහින්ගියා සරණාගතයින් රටට වැද්ද ගන්නා පිළිවෙළ කීවේය. ඉන්දියාව ඔවුන්ට නවාතැන් සපයන ස්ථානයක් නොවන බව ඔහු අවධාරණය කළේය. පසුගිය කාලයේ රොහින්ගියා සංක්‍රමණික හමුදාවක් ලංකාවටත් ආවේය.
ඉන්දියාව පාලනය කළ බ්‍රිතාන්‍ය පාලකයන්ට ‘තමිල්නාඩුව’ නමින් පකිස්ථානය බඳු රටක් හැදීමේ වුවමනාව තිබුණි. ‘තමිල්නාඩු’ නම පවා ඔවුන්ගේ නිර්මාණකි. තමිල්නාඩුව පාලනය කරන දේශපාලනඥයින් ඒ අදහස හිසට දාගෙන සිටිති. ඔවුහු, තමිල්නාඩුවට හින්දි භාෂාව පැමිණීම වැළැක්වීමට වෙහෙසෙති. ඉංග්‍රීසිය ආවාට විරුද්ධ නැත. තමිල්නාඩු මහ ඇමති ස්ටාලින්ගේ දරුවන් ප්‍රධාන පවුලේ සෑහෙන පිරිසක් නවදිල්ලියට යවා ත්‍රිභාෂා (හින්දි, දෙමළ හා ඉංග්‍රීසි) අධ්‍යාපනය දී ඇතැයි තමිල්නාඩුවේ බිජේපී මන්ත්‍රීවරියක් පසුගිය දිනක පැහැදිලි කළාය. පුද්ගලික විශ්වවිද්‍යාලවලට එරෙහිව මොර දුන් මාලිමා නායකයින්ගේ දරුවන් පුද්ගලික විශ්වවිද්‍යාලවලින් හා ජාත්‍යන්තර පාසල්වලින් අධ්‍යාපනය ලබා ඇති අයුරු පසුගිය කාලයේ අනාවරණය විණි. සිංහලයන්, ‘කොකා පෙන්නීම’ කියන්නේ මෙවැනි වංචනික ක්‍රියාවලටයි.
දෙබිඩි ක්‍රියාවක මූලික අරමුණ පුද්ගලයෙකු හෝ පුද්ගල සමූහයක් රැවැට්ටීමයි. රැවැට්ටීම හා රැවටීම මනුෂ්‍යයාගේ ස්වභාවයයි. බොහෝ දෙනෙකුගේ අදහස සිංහලයන් රැවටී මාලිමා ආණ්ඩුවක් පිහිටුවූ බවයි. ගුණමකු බව සිංහල ජාතියේ ගතියකැයි කියන සමහරු සිංහලයන්ට ගුණමකුවන් යැයි චෝදනා කරති. මෙය ඩයස්පෝරාව හා බටහිර තානාපති කාර්යාල කළ කුමන්ත්‍රණයක් බව සමහරුන්ගේ අදහසයි. මිහිඳු හිමියන්ට, මහානාම හිමියන්ට, මහාවංශයට, දුටුගැමුණු රජතුමාට, බණින සිංහලයින් සිටින බව ඇත්තකි. ලංකාවේ සමහර මිනීමැරීම් කරන්නේ සුළු මුදලකට ගිජු වූ පුද්ගලයින් විසිනි.
නරියා කෑමකට එන්නැයි කොකාට ආරාධනා කළේය. කොකා ආරාධනාව බාරගෙන ඉතා සතුටින් නරියාගේ නිවසට ගියේය. කෑම මේසයට එන්නැයි කොකාට නරියාගෙන් ඇරයුම් ලැබුණි. ඌ සුප් එකක් පිස පිඟන් දෙකකට දමා තිබුණි. කොකා ආහාර ගැනීමට නොහැකිව බලවත් අපහසුතාවකට පත් වූයේය. තමාගේ ගෙදර කෑමකට එන්නැයි ඌ නරියාට ආරාධනා කළේය. කොකාගේ කෑම මේසයේ, ආහාර දැමූ කට පොඩි, උස භාජන දෙකක් තිබුණි. කොකා ඒ තුළට හොට දමමින් ආහාරය ආහාර රස වින්දේය. නරියා බඩගින්නේ ආපසු ගියේය.